Translated by Lanvin Andres
Mayroong sining sa pagsagot ng mga tawag sa 911 kapag ang nangangailangan ng tulong ay hindi nakakapagsalita ng Ingles.
Maaaring napakalaking hadlang para sa mga hindi marunong mag-Ingles ang tumawag sa 911 dahil hindi alam ng nakararaming mga residente na mayroong mabilisan at 24-hour access sa mga interpreter na nakakapagsalita ng pinagsamang 194 na mga wika at diyalekto ang mga dispatcher ng 911.
“Sa wari ko, hindi tumatawag ang mga tao dahil sa tingin nila, wala silang makakausap na marunong magsalita ng lenggwahe nila,” sabi ni Jacob Adams, ang deputy director of operations para sa Community Safety and Communications Center ng Seattle. “Umaalalay kami sa mga tao sa iba’t ibang mga lenggwahe, at narito kami para tumulong.”
Maaari din humingi ng tulong ang mga pulis sa mga interpreter sa pamamagitan ng pagtawag gamit ang mga cellphone na inisyu ng kanilang opisina tuwing mag-iinterview sila ng mga hindi marunong mag-Ingles sa isang pinangyarihan ng krimen o aksidente.
Napakahalagang maipakalat ang impormasyong ito sa mga patuloy na lumalagong komunidad na may iba’t ibang lahi matapos ang sunod-sunod na mga nakawan sa mga tahanan ng mga Asiyanong residente sa paligid ng South Precint ng Seattle Police Department.
Karamihan sa mga kasong ito, naaantala ang pagpapadala sa mga pulis ng 15 hanggang 20 minuto dahil sa halip na direktang tumawag agad sa 911 ang mga biktima, tumatawag muna sila sa mga kaibigan o kamag-anak na
marunong mag-Ingles at saka pa lamang sila tatawag sa 911 para sa ipaliwanag ang sitwasyon ng biktima ayon kay Adams at Mark Solomon, ang crime prevention coordinator ng South Precint.
Ang pagka-antalang ito ay nagbibigay ng sapat na panahon sa mga magnanakaw para makatakas matapos nilang piliting makapasok sa mga
nanakawang bahay at saktan, hampasin ng baril, o pagbantaan ang mga residente at tutukan ng baril para ibigay ang mga pera, alahas, at iba pang mahahalagang mga kagamitan nila.
Inaresto ng Seattle police ang limang tao – apat na lalaking nasa wastong gulang na at isang 17-taong binata – umaga ng Miyerkules na konektado sa 14 na kaso ng pagnanakaw simula Hunyo, at kinumpiska ang 14 na baril, mga bala, pera at droga.
Sa ilang mga nakawan, ang mga biktima ay nasa labas lamang ng kanilang mga tahananan nang bigla silang tututukan ng baril at sapilitang papasok sa kanilang mga bahay, ang iba nama’y sumagot lamang sa pagkatok o pag doorbell at pagbukas ng pinto ay puwersahan silang papasok sa bahay, sabi ni Solomon sa isang community safety meeting nitong nakaraang linggo na pinangunahan ng nonprofit organization na Chinese Information & Service Center (CISC). Aniya, sa ibang mga kaso, sinisipa lamang ng mga magnanakaw ang pintuan ng mga papasuking bahay.
Dalawang empleyado ng CISC ang palitang nag-interpret ng mga sinasabi ni Solomon – at binasa nila ng malakas ang mga sinulat na katanungan mula sa mga nakikinig, kasama ang mga dose-dosenang mamamayan na nagsasalita lamang ng Mandarin o Cantonese – noong meeting sa Jefferson Community Center sa Beacon Hill.
“Ang inyong kaligtasang pisikal ay mas mahalaga kaysa sa kahit na anong kagamitan ninyo – kung handa nila kayong saktan makuha lamang ang inyong kagamitan, ibigay niyo na ito,” sabi ni Solomon sa grupo.
Sa isang emergency, kailangang tumawag sa 911 ng mga hindi marunong mag-Ingles at sabihin ang kanilang pangunahing lenggwahe – tulad ng Kastila, Vietnamese, o Tagalog – sa Ingles. Pipiliin ng operator ang lenggwaheng napili mula sa isang automated system at isasama sa tawag ang isang interpreter na empleyado ng CyraCom International, isang language service provider na nakabase sa Arizona na kilala rin noon sa pangalang Voiance, kung saan may kontrata ang lungsod.
Kung mayroon mang hindi kayang banggitin ang kanilang lenggwahe sa salitang Ingles, “maaari kaming tumawag ng isang eksperto sa lenggwahe
upang alamin kung ano ang lenggwaheng ito” sabi ni Adams. Ngunit “kung alam mong sabihin ang iyong lenggwahe – kung kaya mong banggitin ang ‘Tigrinya’ o ‘Korean’ – higit na mapapadali nito ang trabaho ng lahat.”
Kapag nasa linya na ang isang interpreter, “para itong relay,” magtatanong ang dispatcher na siya namang isasalin at uulitin ng interpreter sa tumawag, at saka naman isasalin sa Ingles ng interpreter ang mga sagot ng tumawag,” aniya.
Dahil “hindi naman sakto o 100% ang pagsalin sa Ingles ng ibang mga wika,” sabi ni Adams, ang pagtawag sa 911 na kinakailangan ng interpreter “ay ilan sa mga pinakakumplikadong tawag na iyong gagawin.”
“Para itong isang sining. Kailangan mo magtanong ng maigsi at siguradong mga tanong dahil kung hindi, masyadong dadami ang pag-uusapan” sa pagitan ng tumatawag at ng interpreter bago maintindihan ng dispatcher ang sagot, aniya. Karaniwang magtatanong ang mga dispatcher ng mga tanong na masasagot ng ‘oo’ o ‘hindi’ upang maintindihan kung agaran ba ang pangangailangan ng pulis o ng medics.
“Isa itong malaking hamon para sa mga operator ng 911 dahil kailangan naming makuha ang impormasyong ito nang mabilisan,” sabi ni Adams.
Pinapatakbo ng Seattle police ang call center ng 911 hanggang noong spring, taong 2021, nang pinagbotohan ng City Council (Konseho) na ilipat ang responsibilidad sa pagsagot ng mga emergency calls sa bagong tatag na Community Safety Communications Center. Hinawakan ng center na ito ang higit-kumulang 900,000 tawag kada taon, o 2,000 hanggang 2,500 tawag sa 911 kada araw, kung saan mayroong mga tawag na nangailangan ng interpreter sa bawat shift, sabi ni Adams.
Ang mga operator ng center ay kaya ring mag-access ng iba pang relay services para tulungan ang mga tumatawag na bulag at bingi at kaya rin tumanggap ng mga text message sa 911 – sa Ingles lamang – na siyang pinakikinabangan nang husto ng mga komunidad na may kapansanan sa pandinig,” aniya.
Maaaring magpadala ng text sa 911 saan man sa buong county ngunit kailangan lamang gamitin ito kung hindi ligtas ang pagtawag sa 911, sabi ni Adams.
Ginagamit din ng Seattle at King County ang Smart911, isang libreng serbisyong nasyonal na pinapayagan ang mga residente na boluntaryong magbigay sa 911 ng mga impormasyon tungkol sa kanilang mga sarili at mga kasama sa bahay – kasama ang adres ng tirahan, kondisyong medical at mga emergency contact.
Lumalabas ang isang user profile sa screen ng isang dispatcher kapag tumawag ang isang teleponong rehistrado sa Smart911, at nawawala ito oras na matapos ang pag-uusap. (kung nais magpalista, pumunta sa Smart911.com).
Pinapayagan din ng Smart911 na makapili ang mga tao ng kanilang pangunahing lenggwahe mula sa listahan ng higit sa 130 mga lenggwahe – na nagpapadali sa agad na paghingi ng dispatcher ng isang interpreter kapag nakasaad ito sa impormasyon ng tumatawag.
Kastila o Spanish ang lenggwaheng pinakamadalas na hinihingi sa Seattle, 60% hanggang 70% ng mga tawag sa 911 ang nangangailangan ng interpreter, sinundan ng Vietnamese, Mandarin, Russian at Cantonese, sabi ni Adams.
Ngunit, dahil sa dami ng iba’t-ibang lahi sa lungsod, kinakailangan din ang mga interpreter para sa mga nagsasalita ng iba pang mga lenggwahe, tulad ng Ukrainian, French Creole at iba pang mga lenggwahe sa Africa.
Dinaig na ng 4,786 na tawag sa 911 kung saan kinailangan ang tulong ng isang interpreter nitong taong ito ang 4,193 na tawag noong buong taon ng 2022, sabi ni Adams. Mayroong 3,256 na ganitong tawag noong 2021, higit na mataas sa 2,593 bago ang taong iyon.
Naaalala pa ni Adams, na siyang naglingkod din bilang isang 911 operator, ang mga panahong kinailangan niya ng interpreter sa wikang Kastila ngunit wala siyang makuha dahil ang lahat ng mga interpreter ay nasa ibang linya na.
“Napakahirap ng pakiramdam na iyon,” aniya. “Alam naming hindi naman tumatawag sa 911 ang mga tao nang basta-basta lamang kaya alam namin na may problema talaga pero wala kaming magawa dahil kailangan talaga ng interpreter.”
